Fobitë më të çuditshme të botës

Fobia nga palaçot: pas filmit, të frymëzuar nga një libër i Stephen King-ut, vështirë të mendosh se është e çuditshme apo groteske dhe jo e formuar një fobi e tillë. Megjithatë, palaçot duhet të ishin të këndshëm, argëtues ose të paktën zbutës.



Globofobia apo fobia nga topat e vegjël: po, po, pikërisht nga ata me ngjyra të ndezura që u blihen kudo fëmijëve nëpër panaire, kënde lojërash a plazhe! Më tepër se të brishtë e megjithatë, të tmerrshëm për kë vuan nga kjo lloj fobie.



Fobia nga pambuku: ose, për të qenë më të saktë, nga shukat e pambukut! Ja, nga ato që femrat përdorin për të pastruar fytyrën. Të jetë kultivuar vallë që nga vegjëlia, ku në mos me “gogolin” na trembnin me “teta doktoreshën që të bën gjilpërën” (kjo puna e injeksioneve është një fobi jashtëzakonisht e përhapur, që nga fëmijët e deri tek burrat me mustaqe) apo “pambuku i frikshëm” u bashkëngjit ndjesinë e peliçes së ndonjë kafshe të rrezikshme?!

Fobia nga kastravecët: tamam-tamam, është fjala për kastravecët turshi, që janë aq të gjelbër, krokantë dhe të shijshëm. Ec e merre vesh, po ja që ka nga ata që kastravecët turshi iu kallin datën!

Ithyphallofobia: Ky llafi i gjatë nuk është gjë tjetër veçse saktësisht frika nga penisi i erektuar. Asnjë femër s’e besoj se ia lejon vetes këtë “tmerr” dhe askush nuk do t’ia uronte kurrë një burri! Edhe kjo duhej!



Efebofobia: frika nga adoleshentët. “Epo, – do të thotë ndonjëri, – po bëhen gjithmonë e më të terrorizues për më të moshuarit...”. Të jemi realistë: a nuk është pikërisht i tillë alternimi i zakonshëm midis gjeneratave?



Gimnofobia: frika e të qenit lakuriq apo e lakuriqësisë së të tjerëve. Pas gjithë këtyre, ndoshta duket më pak e çuditshme nga të gjitha, nëse marrim parasysh sa rëndësi ka sot aspekti social i një personi dhe pranimi i lakuriqësisë pa qenë i mbrojtur. Kjo është shpesh e lidhur me ankthin në planin seksual.

Fobia nga mobiliet antike: nëse imagjinojmë se njësoj si tek “Harry Potter” një skrivani mund të tentojë të na sulmojë, atëherë do të ishte plotësisht e justifikueshme. Por fobitë, dihet, janë të një natyre irracionale... kështu që, përse vallë poltrona e vjetër e preferuar e tetos që vdiq shumë plakë nuk duhet t’i kallë datën ndokujt?



Neofobia apo kainotofobia: e kundërt me frikën e mësipërme është pikërisht kjo, fobia nga e reja, nga risitë, për shkak të drojës se mos nuk arrijmë ta kuptojmë apo ta zotërojmë atë. Sot kjo lidhet në thelb me teknologjinë, në kuptimin praktik të fjalës, por në kuptimin e gjerë mund t’i referohet çdo lloj ndryshimi të relievit në jetën e atij që vuan nga kjo lloj fobie.



Pteronofobia: frika nga puplat. Shumë më tepër se frika e gudulisjes së thjeshtë që ato mund të shkaktojnë...