Fejesa ne moshe te vogel

**********
Ata janë ndoshta çifti me moshën më të vogël në Shqipëri. Ajo quhet Floresha dhe sapo ka mbushur 13 vjeç, ndërsa ai mban emrin e një artisti të njohur në Hollivud. E thërrasin Çaknorris Mustafai dhe është 14 vjeç. Që nga gushti i këtij viti banojnë të vetëm në një shtëpi private në lagjen “5 Maji” Elbasan. U njohën, u dashuruan, u fejuan dhe u martuan si të gjithë çiftet e tjerë, ndonëse ligjërisht të pacelebruar.
Njohja dhe lidhja
U njohëm kur ishim në shkollë. Unë shkoja në shkollën “Xhaferr Kongoli”, ndërsa ai në shkollën “Qemal Haxhihasani”. Më kishte ndjekur disa herë nga pas. Por unë i fshihesha gjithmonë. Një ditë më ndaloi në rrugë dhe më tha “të dua dhe më pëlqen të martohem me ty”. Unë i thashë që të vinte të më kërkonte në shtëpi. Isha dhjetë vjeçe kur më propozoi”, tregon Floresha. Burri i saj bëhet xheloz, tenton ta ndalojë, e qorton, madje edhe e kërcënon. Por ajo kënaqet dhe qesh, sepse i pëlqen t’i kujtojë çastet që kanë kaluar para fejesës bashkë.
Çaknorris Mustafai ka një shtëpi të madhe, aq sa ai dhe nusja duken si kukulla brenda saj. Shtëpia ka korridorin e madh, kuzhinën, dhomën e pritjes dhe dhomën e gjumit. Më e kompletuar duket dhoma e gjumit. Brenda saj ndodhen të gjitha takëmet e një çifti të vërtetë. Të vegjlit janë të destinuar ta përballojnë të vetëm jetën. Prindërit e tyre janë emigrantë në Greqi.
Jeta e çiftit
Jeta e të miturve nis që herët në mëngjes. Ajo rregullon krevatin dhe fillon nga punët e shtëpisë. Pasi lahen dhe pastrohen, hanë mëngjesin bashkë. Në orën 8 Çaknorris niset për në punë. Merret me tregti rrobash. Rrobat i sjellin prindërit nga Greqia. Pasi mbaron punët e shtëpisë, në treg shkon edhe Floresha. E ndihmon të shoqin të bëjë pazar, të dijë të flasë me klientët dhe të bëjë llogaritë. Shesin deri në orën 15:00, kohë kur mbyllet edhe tregu. Floresha ka kohë të lirë mëson edhe abetaren, për të mos qenë analfabete. Pas një dite të lodhshme burri shtrihet në krevat dhe nusja pas tij.
E ardhmja
Dashuria duket shumë e fortë. “Gjatë kësaj kohe e kam dashur shumë Çaknorrisin. Ai është çapkën. Unë e kuptoj që më do, ndaj i vij nga pas dhe ia plotësoj të gjitha tekat”, thotë Floresha. “Kur të mbush 16 vjeç, duhet të lind fëmijë. Jemi të pacelebruar, por pa problem. Në këtë moshë unë duhet të lind, ndryshe Çaknorrisi edhe mund të më lërë, nëse nuk bëhem nënë. Pavarësisht moshës, unë ndjehem një grua si gjithë të tjerat dhe më pëlqen të administroj burrin dhe shtëpinë”.