Një zë shqiptar, në politikën Belge

"Të dashur të gjithë, – shkruante Elona Zhana në mesazhin e datës 3 prill. – Pas një reflektimi relativisht të gjatë dhe pas konsultimit me miqtë, të afërmit, mentorët dhe përkrahësit e mi, mora vendimin të angazhohem politikisht në Belgjikë. Në zgjedhjet rajonale të datës 25 maj 2014, do të jem kandidate për deputete në Parlamentin Rajonal të Brukselit, në radhët e partisë cdH…” Për dijeninë e lexuesit, shtoj se Brukseli me 19 komunat që përfshin administrativisht dhe gjeografikisht është një ndër njësitë federative që formojnë Belgjikën. Ai ka Parlamentin, Qeverinë e vet, si edhe të gjitha institucionet përkatëse kushtetuese.
Centre démocrate humaniste – cdH – (Qendra e demokracisë humaniste), është Parti e qendrës së djathtë, anëtare të PPE (Partive Popullore Europiane) ku bën pjesë edhe Partia Demokratike e Shqipërisë, tek e cila aderoj.
Me anë të një mesazhi elektronik, fare të shkurtër e modest, ajo njoftoi papritmas bashkëpunëtorët e “Albania”-s, ata të Radios “Jehona e Shqipes”, të njohurit dhe gjithë dashamirët e saj – bashkatdhetarë me banim në Belgjikë, Belgë të origjinës ose të komuniteteve të tjera – se ka vendosur t’i hyjë rrugës së gjatë e të vështirë të karrierës politike.
*****
Cila është Elona Zhana?
Me origjinë nga Bajram Curri, Tropojë, Elona Zhana jeton në Bruksel që prej vitit 2001. Është diplomuar për Marrëdhënie me Publikun dhe Administrim e Menaxhim të Punës në ULB – Université libre de Buxelles (Universiteti i Lirë i Brukselit). Është “grua e plotpërmbushur” – siç shprehet vetë – dhe nënë e lumtur e një vajze dymbëdhjetëvjeçare.
Elona zoteron disa gjuhë të huaja. Gjuhën shqipe, gjuhën e nënës, e flet dhe e shkruan me kujdesin më të madh. Kurse dashurinë dhe pasionin për të, përpiqet t’ia injektojë edhe së bijës.
Elona është autore e shumë artikujve, sidomos në shtypin e diasporës shqiptare të Belgjikës. Ka botuar katër libra në gjuhën shqipe:
• “Përtej unit”, poezi e prozë poetike (2001);
• “Sarkofage e hënës cigane”, novelë (2006);
• “E huaja”, roman (2012);
• “Gjurmë”, prozë poetike (2012).
Përvojë të pasur, ka gjithashtu në fushën e përkthimeve, sikurse edhe në atë të administratës. Aktualisht, punon si e pavarur në sigurime dhe financë.
Elona njihet nga bashkësia jonë shqiptare për angazhimet e saj në fusha të ndryshme. Ajo eshte kryeredaktore e gazets “Albania” ne Belgjike. Përveç të tjerave, ajo ka spikatur në veprimtari të ndryshme kulturore, si:
• “Miss Albania Benelux”, 2010 – 2012;
• “Albania Gala I & II”;
• “25-vjetori i Radios Jehona e Shqipes”;
• “Takim me Ismail Kadarenë”;
• “Promovimi i Librit të Helena Kadaresë” etj.
****
Shpallja e kandidaturës së Elona Zhanës u zhvillua të mërkurën e kaluar, në orën 19.00, në një mjedis paksa të ngushtë, më tepër miqësor sesa zyrtar, por tepër domethënës për konsideratat e cdH-së ndaj saj.
Nisma ishte e zonjës znj.Julie de Groote, kryetare e grupit parlamentar të partisë cdH për Bruksel – Valoni.
Pikerisht  në shtëpinë e zonjës de Goote, përveç të tjerëve, ishin edhe 22 anëtarë të bashkësisë shqiptare të Belgjikës.
Ishin të pranishëm, gjithashtu, zoti Francis Delpérée, senator i cdH në Senatin Belg, një ndër konstitucionalistët më autoritarë të reformës së 6 të shtetit; gjithashtu edhe znj. Joelle Milquet, zëvendëskryeministre, Ministre e Brendshme dhe e Shanseve të Barabarta në ekipin qeveritar të Kryeministrit  te tanishëm Belg  zoti Elio di Rupo.
Fjalën përshëndetëse e mbajti vetë zonja Julie de Groote, e cila, pasi falënderoi të pranishmit për pjesëmarrjen në evenimentin e rastit për kandidaten e cdH, tregoi lidhjet e saj me bashkësinë shqiptare dhe arsyet e përkrahjes së  kandidaturës së Elona Zhanës me nr 44.
Pas kësaj, ajo shpalosi për disa minuta programin e Partisë në zgjedhjet e ardhshme të 25 majit 2014.
Në bisedën e tij miqësore, Senatori Delpérée rrëfeu  pjesëza nga kujtimet e tij si politikan dhe si profesionist në fushën e së drejtës.
Të pranishmit e tjerë që e morën fjalën, shpalosën lidhjet e vjetra e të reja mes partisë cdH dhe bashkësisë shqiptare, qysh në vitet ’50 – ’60, kur shqiptarët e parë u ngulën në Belgjikë dhe kur Partia emërtohej ende me emrin e themelimit, Kristian Demokrate. Gjatë takimit, nuk mund të mos viheshin në dukje vlerat humaniste të kombit dhe të shoqërisë shqiptare.
Elona Zhana u shpreh thjesht se ndihej jo vetë e emocionuar, por edhe shumë e privilegjuar për nderin që po i bëhej dhe për vlerësimin që po i jepej. “Forca ime, tha ajo, jeni ju që më rrethoni. Ajo buron prej jush. Unë do t’jua rikthej, duke jua shpërblyer me punë e me përkushtim.”