Afrim Alia

Afrim Alia,nga Australia në bregdetin shqiptar

Nga Neritana Kraja



Afrim Alia, modeli shqiptar që jeton në Australi dhe synon botën e televizionit italian, prej disa javësh po shijon plazhet e bukura të bregdetit shqiptar. Megjithëse përpiqet të mbetet anonim ai nuk mund t’i shpëtojë syrit kurreshtar të njerëzve, aq më tepër të vajzave të cilat duke ditur statusin e tij prej beqari, përpiqen të shfrytëzojnë mundësitë joshëse që të jep stina e nxehtë e verës. Afrim Alia në një rrëfim për projektet e reja të këtij viti, kur ka patur mundësi të provojë eksperienca të panjohura dhe të shohë më me guxim nga e ardhmja. Por jo vetëm kaq. Edhe rrëfimi për dashurinë e tij të humbur me modelen e njohur australiane.



Me kapelen mbi kokë, syzet e errëta dhe flokët pak më të rritura se ç’i mban zakonisht, modeli shqiptar Afrim Alia prej javësh është kthyer në një prej pushuesve të plazhit të Durrësit. Përpiqet që të mos bjerë në sy të pushuesve të tjerë, kërkon të ruajë shumë nga privatësia e tij, por kjo gati është e pamundur, kur bëhet fjalë për modelin që megjithëse jeton larg, shfaqet shpesh në faqet e gazetave dhe të revistave dhe prandaj nuk mund të ngelet anonim. “Ah, je ti, ai modeli…?!”, dëgjon të thuhet shpesh nga njerëzit. Por edhe në rastet kur nuk e njohin si model, si mashkull është e pamundur të mos tërheqë vëmendjen, sidomos të femrave, të cilat nuk mund t’i shpëtojnë tundimit për të soditur një trup me një muskulaturë të mirëformuar dhe një profil të egër mashkullor, por që zbutet sapo nis e buzëqesh.


“Nuk mund ta shmang kënaqësinë për t’u kthyer çdo verë në Shqipëri, për të takuar familjen dhe miqtë, thotë Afrimi. Me ta gjthçka bëhet më e bukur dhe dita më duket një orë”.



Miqtë më të mirë i kam ato të krijuar gjatë viteve. Një pjesë e tyre jeton këtu, të tjerët si dallëndyshet vijnë në Shqipëri. Një ndër ata që kthehen jam edhe unë”.



Por nëse një pjesë të kohës e kalon me miqtë që vijnë gati përditë për ta takuar në plazhin e Durrësit, pjesën më të madhe dhe të bukur të qëndrimit atje, e kalon me familjen e cila gjatë gjithë vitit i mungon shumë.







Dhuratë për ditëlindje



Ditëlindja e nënës që mbushi 54 vjeç e ka nxitur Afrimin që t’i bënte asaj si dhuratë dy javë pushime në bregdet. Kjo është arsyeja që familja Alia, prej dy javësh ndodhet në plazhin e Durrësit, meqë është më afër Tiranës dhe atij i duhet të vijë shpesh në Tiranë ku takimet, megjithëse ka ardhur për pushime, janë të shumta.



Ka pak ditë që është kthyer nga Australia dhe ca ditë në plazhet e jugut të Shqipërisë, kanë qenë ndalesa e parë e Afrimit. “Më pëlqejnë plazhet e jugut dhe ndër to do veçoja Dhërmiun. Jam i tërhequr nga bukuria e bregdetit të jugut, dhe jeta stimuluese e natës që bëhet aty. Është diçka lokale që më pëlqen”. Ndërkohë zhurma dhe muzika në plazhin e Durrësit, e bëjnë të sjellë në mendje, përmes një kontrasti të fortë, plazhet mahnitëse të Australisë, tek të cilët gjen gjithçka, veç njerëzve të afërt. “Bukuria e bregdetit australian është mahnitëse. Plazhet atje janë të virgjër, mjaft të pastër, me peizazh të gjelbër dhe të sigurt. Janë ndër bukuritë më të mbresëlënëse në botë. Ndërsa në Durrës, muzika e lartë nuk pushon deri pas mesnate dhe njeriu shpesh bezdiset nga kjo gjë. Zakonisht shkojmë në lokalet ku luhet muzikë popullore dhe kjo për hatrin e nënës sime, sepse po të ishte për mua, më pëlqen shumë të dëgjoj muzikë të përmasave të tjera”, thotë duke qeshur Afrimi. Aq më tepër tani që lidhja e tij me muzikën është bërë më e fortë dhe më e drejtpërdrejtë.

Rastësisht producent

Askush nuk do ta kishte menduar Afrimin në rolin e promotorit, duke u marrë me organizimin e koncerteve madhështore, të grupeve më të mira të kohës, që bëjnë turne në Australi. Puna në kompaninë “Show time Touring Group”, ku ai është i angazhuar në organizmet e gjithçkaje që ka të bëjë me artin, ka bërë që Afrimi ta shohë veten të suksesshëm edhe në një pozicion të ri.

“Të gjitha rrugët në karrierën time i kërkova dhe i hapa vetë. Askush nuk të jep gjë. Atë që bëra e krijova “nga rruga” dhe sot jam akoma duke kërkuar të hap rrugë të tjera. Motoja ime është: mos shih prapa, por vetëm përpara. Kjo gjë më bën që të jem gjithmonë në kërkim”.

Duke treguar për atë që po ndodh me jetën e tij, Afrimi rrëfen se në momente të caktuara jeta e tij duket sa e tensionuar, aq edhe “big”.

“Kisha planifikuar gjithçka që të shkoja në Itali dhe të ndërtoja një karrierë të re, diçka që nuk ka të bëjë me modën, por me televizionin, ose kinemanë. Prandaj kam rritur pak edhe flokët. Nuk e mendoja se për arsye të vonesës së dokumenteve, të humbja një vit nga plani im, por që gjithsesi nuk e kam çuar dëm. Kam zhvilluar në Sidney një shkollë aktrimi, kam punuar me kompaninë “Show time”, ndërkohë që edhe këtë vit do të synoj që të përmbush ëndrrën time, Italinë. Pasi siç i thonë një fjale të urtë: “Borxhi i vonë, gëzon të zonë”, shpjegon duke fituar në zërin e tij nota entuziazmi. Sipas Afrimit, modelimi është një profesion part –time, që askush nuk e ushtron përditë, veç dy –tre emrave të mëdhenj në fushën ndërkombëtare të modës. “Gënjejnë ata që thonë se punojnë vetëm si model. Kjo është e pamundur”.

Së fundmi ka realizuar një shërbim fotografik, për të cilin shpreson të jetë fitues për të reklamuar parfumin e ri të Hugo Boss në revistën prestigjoze “GQ”. “Me menaxherin dhe fotografin italian, mikun tim Roberto Granata, kemi bërë fotografi të mrekullueshme dhe nëse arrijmë të përzgjidhemi, gjë për të cilën unë jam i bindur, do kem në dorë një kontratë të mrekullueshme dhe mjaft fitimprurëse. Por ndërkohë, koha nuk duhet çuar dëm”.



Mik me yjet e muzikës

Në dorë mban një dosje të madhe me kontratat dhe fletëpalosjet e këngëtarëve apo grupeve muzikore me të cilët ka punuar gjatë kësaj kohe: Timbaland, 50 Cent, Boys II Men, etj. “Pozicioni i ri më pëlqen thotë ai. Po përpiqem të mësoj përditë nga ky zanat, që megjithëse e shoh si të përkohshëm, e vlerësoj dhe e bëj me kënaqësi. Nuk lodhem nga kjo punë, por kënaqem kur vjen dita e koncerteve dhe shoh sallat që tejmbushen nga publiku entuziast. Keqardhja ime është se më 17 gusht nuk mund të jem në koncertin e Justin Timberlake meqë do jem akoma në Shqipëri. Kemi punuar mjaft për ta sjellë këtë këngëtar dhe asaj nate nuk mund të jem…”

Me secilin prej tyre ka arritur të bëjë miqësi. Ndërkohë që eksperienca e kësaj periudhe e ka bërë të mësojë gjëra të reja.

Jaime Wright, dashuria e vjetër

Nuk ka rëndësi kombësia e saj, rëndësi ka të jetë njeri në plotkuptimin e fjalës. Një vajzë me karakter, e dashur, e zgjuar, simpatike dhe e gatshme për ta përballuar jetën përkrah tij. Një femër me të cilën ndihet vërtet i dashuruar…

Kështu e përcakton Afrimi vajzën që akoma nuk ka mbërritur në jetën e tij. Flirte, lidhje të shkurtëra që mbarojnë pa nisur mirë, aventura të vogla, përse të gënjejë, e pranon se e kanë shoqëruar gjatë këtyre viteve jetën e tij, por asgjë serioze.

Habitet kur në gazetat shqiptare lexon se është lidhur me këtë apo atë vajzë. “Nuk e di nga i nxjerrin këto emra, edhe vetë çuditem. Por ma do mendja se i nxjerrin vetë vajzat e përmendura në këto artikuj…Realisht këto histori nuk kanë qenë dhe nuk janë. E vetmja histori e vërtetë dashurie disavjeçare, që kam pasur në jetën time dhe që nuk e kam treguar asnjëherë, që as gazetat nuk kanë mundur ta zbulojnë, pasi e kemi ruajtur me fanatizëm, është ajo me modelen australiane Jaime Wright. Ishte një lidhje shumëvjeçare, e bukur dhe pasionante. Por që si çdo lidhje kishte ngjitje – zbritjet e veta. Nuk e kam përmendur emrin e saj, as kur isha në hapat e mi të parë dhe fama e saj mjaft e madhe, ndër më të njohurat në Australi dhe kjo gjë mund të më ndihmonte për të bërë karrierë… Është hera e parë që e bëj publike një gjë të tillë, thjesht për të treguar se lidhjet serioze për mua janë të vyera dhe nuk kanë pse të shkruhen në radhët e gazetave, nëse njëri nga dy të përfolurit nuk është i interesuar t’i publikojë”.

Ndërsa flet, me dialektin e bukur të veriorit dhe ngjyrimin tipik të anglishtes, merr aparatin fotografik që së bashku me laptopin e fotove nuk e heq nga dora dhe tregon foton e një bebeje të vogël të mrekullueshme. “Është mbesa, Zholi, vajza e motrës sime, të cilës i kam vënë edhe emrin. Ky fëmijë më ka bërë që të zgjohet brenda meje instikti i prindit, ndaj më ka lindur dëshira të kem edhe unë fëmijën tim”, shton ai.





Përse Italinë?

Nga Italia nuk ka hequr dorë. “Është televizioni ai që i mban të angazhuar “çunat” tanë në Itali, të cilët kanë mundur të bëjnë emër atje. Të gjithë kanë arritur të bëhen të famshëm vetëm përmes tij. Pasi modeli i televizionit italian të jep një mundësi të tillë. Ai ndryshon si nata me ditën nga televizioni Australian. Televizioni italian është televizion i imazhit, prandaj edhe dua që ta shfrytëzoj këtë mundësi. Ndërsa ai australian është televizioni i realitetit”.