Saimir Strati

Kush është
Saimir Strati është 40 vjeç. Është diplomuar për pikturë në Akademinë e
Arteve të Bukura në 1989. Po këtë vit fiton Çmimin e Parë në Konkursin
Kombëtar të Arteve të Aplikuara. Ka punuar si restaurator i mozaikëve
në sitet antike të Butrintit, Apolonisë dhe Bylisit. Në 1996 hap të
parën ekspozitë personale. Dy vjet më pas një tjetër ekspozitë ku
prezanton bashkë me pikturën edhe punët e para në mozaik.

Saimir Strati thyen rekordin Guiness

Për herë të parë Shqipëria pranohet në librin e rekordeve Guinnes.
Certifikatën e parë për vendin tonë e ka rrëmbyer piktori Saimir Strati, i cili u pranua në rekordet botërore me portretin e Leonardo da Vinçit të formuar me gozhdë. Përfaqësuesi i rekordeve Guinnes, Kristinan Skot, pas matjes së portretit, i cili kishte përmasat 4 x 2 (m), vendosi t'i japë piktorit shqiptar rekordin e ri. Strati ka punuar prej 25 ditësh për portretin që përmban 5 000 gozhdë. Çdo ditë ai punonte nga ora 8 e mëngjesit deri në 4 të pasdites dhe 5:30 deri në 10 të mbrëmjes. Piktori u shpreh se ndjehej shumë i kënaqur që u regjistrua në rekordet botërore, që, sipas tij, nuk ishte e pamundur dhe mund të arrihej me punë. Vepra të tjera të Stratit janë edhe një portret i Elvis Pristlit me CD dhe një pikturë e formuar me lëvozhga veze. Strati kishte aplikuar edhe më parë në Guinnes me një bisht cigareje të formuar me kokrriza rëre. Gjatë marrjes së certifikatës,portreti i Da Vinçit shoqërohej edhe me një ekspozitë mozaikësh të tjerë.

Saimir Strati, historia e mozaikëve të Guinnes

Me të paktën 1 milion kunja dhëmbësh dhe me 13 orë punë intensive në ditë, në verën e vitit të kaluar, Saimir Strati realizoi në Tiranë mozaikun më të madh në botë, me shkopinjtë e hollë që përdoren rëndom nga gjithkush, por pa i shkuar ndër mend se ato mund të përbëjnë lëndën e parë për një vepër arti. Saimir Strati, 44 vjeç, shqiptari që u regjistrua në librin Guinnes, dy vite më parë caktoi datën 4 shtator, si ditë të përfundimit të veprës së tij, që e quante pa mëdyshje “një tentativë të re për Gu-innes” dhe që u mirëprit pa mëdy-shje edhe këtë herë nga Libri i Rekordeve Guinnes. Këto ditë ai ka hapur një ekspozitë personale në galerinë “Ibrahim Kodra” të Ministrisë së Kulturës, pjesë e së cilës janë dhe veprat e njohura. Nga portreti i Leonardo Da Vinçit, 8 metra katrorë, të cilin e realizoi një vit më parë me 500 mijë gozhdë tringjyrëshe, me një peshë rreth 700 kilogram dhe me të cilin theu rekordin Guinnes, fantazia e tij “kapricioze” e nxiti të ndërtojë një kalë në vrapim, me përmasa 4x 2, të vendosur mbi një platformë prej polisteroli dhe gomë të bardhë. 40 ditë punë, si për t’iu referuar Jezu Krishtit dhe ringjalljes së tij, ai prezantoi mozaikun e tij më 4 shtator ‘07, përpara gjyqtarëve të Guinnes, të cilët një vit më parë e vlerësuan pa mëdyshje veprën e tij të quajtur “çudia e gozhdëve”. Puna e tij është filmuar në çdo detaj, ndërkohë që një komision i përbërë nga njerëz të fushave të ndryshme, e kanë ndjekur hap pas hapi punën e tij. Dy vite më parë, Scott Christie, anëtar i jurisë së çmimit Guiness, i ardhur posaçërisht nga Londra në Tiranë, u shpreh se vepra e tij është diçka krejt unikale dhe spektakolare. “Nuk ka pasur asnjëherë më parë një mozaik të bërë me gozhdë”, ishte shprehur atëherë Christie për shtypin. Në fakt ideja e një mozaiku të punuar me lëndë të papërdorura më parë ishte e vetë piktorit, që gjithmonë pati ëndërruar të kishte emrin në Librin e Rekordeve Guiness. Edhe zgjedhja e autoportretit të Leonardo da Vinçit nuk ishte e rastësishme për piktorin, i cili e konsideron Da Vinçin si ”njeriun që e arrinte atë që për të tjerët ishte e paarritshme”. Strati, prej 17 vitesh krijon mozaikë, jo vetëm në dy, por edhe në tredimensional. Ai është kërkues i lëndës, i “gurit” të mozaikut që nga lëvozhgat e vezës, qelqi, e deri tek disqet. Dy vjet më parë realizoi me 400 disqe në përmasat pak më shumë se natyralja portretin-mozaik të Adriano Çelentanos. Pas Agim Agushit, shqiptari që hyri në Librin Guinnes për rekordin e mbajtjes së topit me kokë ulur, Strati ishte i dyti shqiptar që hyri në librin e çudirave botërore, por i vetmi në fushën që ka zgjedhur. Ai është diplomuar në pikturë në Akademinë e Arteve të Bukura në 1989 dhe po këtë vit fitoi Çmimin e Parë në Konkursin Kombëtar të Arteve të Aplikuara. Ka punuar si restaurator i mozaikëve në sitet antike të Butrintit, Apolonisë dhe Bylisit. Në 1996 hapi ekspozitën e parë personale. Tre vjet më pas çeli një ekspozitë, ku prezantoi bashkë me pikturën edhe punët e para në mozaik. Libri i rekordeve Guinnes, që botohet çdo fillimviti, është botuar për herë të parë në vitin 1951 falë anglezit Hufh Beaver. Dhe tashmë kanë kaluar 56 vjet që libri botohet në 100 vende të botës, në më shumë se 20 gjuhë të planetit

Petrika GROSI

Rekordi i katërt “Gines” për artistin shqiptar Saimir Strati është afër dhe i sigurtë. Deri në muajin nëntor, Strati tregon në një intervistë ekskluzive të dhënë dje për gazetën “Albania” se, do të arrijë që ta përfundojë mozaikun e radhës. Një tjetër rast unikal në librin e rekordeve gines që i bën jehonë Shqipërisë. Kësaj here, vepra do të jetë një mozaik kushtuar “Mbretit të Popit”, të ndjerit Majkëll Xhekson, imazhi i të cilit do të ndërtohet sajë instalimit me mjeshtëri të 300 mijë penelave nga artisti. E veçanta tjetër është se puna do të bëhet duke udhëtuar përgjatë 35 ditëve nga një qytet në tjetrin, në Shqipëri dhe në Kosovë. Sipas Stratit, jo vetëm njerëzit e thjeshtë mund të ndihmojnë në realizimin e këtij projekti që kushton jo pak por 80 mijë euro; interesi është i madh edhe për bizneset e ndryshme, pushtetin lokal dhe Ministrinë e Turizmit e të Kulturës, të cilat mund ta mbështesin realizimin e mozaikut që do të shënojë një tjetër gines për shqiptarët, duke tërhequr vëmendjen e medieve vendëse, rajonale e më gjerë.

Saimir, kemi marrë vesh se po merreni me një punë të re, e cila pritet të sjellë edhe ginesin e katërt. Për çfarë bëhet fjalë?

Është një mozaik unikal, më i madhi në botë, i bërë me penela. Këtë vit kam zgjedhur mënyrën e veçantë të të punuarit duke udhëtuar. Në muajin tetor do të nis punën në Sarandë për të vijuar më tej në qytete të tjera si Gjirokastra, Vlora, Fieri, Berati, Korça, Elbasani, Durrësi, Shkodra, Kukësi, Prizreni, Prishtina dhe Tirana. Sipas parashikimeve, mozaikun duhet ta përfundoj në muajin nëntor. Kjo gjetje është parë me shumë interes edhe nga Komiteti i Ginesit.

Më konkretisht, çfarë subjekti do të ketë kjo vepër?


Kam përzgjedhur Majkëll Xheksonin, duke bërë njëherësh edhe një homazh artistik për të. Ndërsa sa i përket teknikës, mendoj se sërish e gjitha kjo ka lidhje me Majkëll Xheksonin pasi ai ka qenë një performues i mrekullueshëm.

Po sa i takon teknikës që do të përdorësh për mozaikun e ri, ç’mund të zbulojmë?

I kam mbajtur të gjitha elementet dhe strukturën që është përdorur në Ilirinë e para 3 mijë vjetëve. Jam një pasardhës i ilirëve dhe si i tillë dua që ta çoj më tutje teknikën e tyre, kuptohet, duke e pasuruar me pjesën bashkëkohore. Është një pasardhje që ka një taban kulturor dhe pikërisht ky fakt, do të jetë shkaku që do të udhëtoj gjatë punës me mozaikun në të gjitha qytetet kryesore të Shqipërisë dhe në Kosovë. Materiali që do të përdor në këtë rast janë penelat, të cilat piktorët i kanë përditë nëpër duar.

Si do të instalohen këto penela në mozaik dhe sa mendon se do të arrijë numri i tyre?

Për këtë punë do të më duhen rreth 300 mijë penela që do të instalohen në një platformë druri, mbi të cilën do të jetë një shtresë tape, e cila do t’i mbajë për momentin dhe më pas ato do të ngjiten. Kjo vepër do të jetë e shikueshme dhe e prekshme për shumë e shumë dekada.

Sa do të kushtojë ky projekt kaq ambicioz?

Vlera e përgjithshme shkon rreth 80 mijë euro. Është rasti që të bëj diçka tjetër për Shqipërinë dhe do të isha i motivuar nëse edhe shqiptarët do të më përkrahnin, ashtu siç unë po e regjistroj në emër të tyre këtë rekord të ri gines.

Në ç’kuptim kërkon përkrahjen e shqiptarëve?

Duke u nisur që nga njerëzit e thjeshtë, e deri te bizneset, të cilat mund ta gjejnë veten shumë mirë në këtë projekt, i cili do të përshkojë 2500 km në Shqipëri dhe në Kosovë; mbi bordin e një kamioni, mozaiku gjigand i Majkëll Xheksonit do të udhëtojë në qytetet që përmenda më parë, ndërkohë që unë do të punoj 16 orë në ditë, në mënyrë që ta realizoj veprën brenda 35 ditëve. Këto kohë ka nisur dhe fushata e sensibilizimit të shqiptarëve për të ndihmuar në vendosjen e këtij rekordi të ri. Numri im i llogarisë është: Raiffeisen Bank, 2102144079 ALL dhe 2100144079 Euro. Thirrja ime u drejtohet të gjithë atyre që e ndiejnë veten shqiptarë. Nëse çdo shqiptar, do të arrinte të më jepte pesë penela, e gjitha kjo do të realizohej pa asnjë problem.

Aktualisht je mbajtës i tre rekordeve gines, si të bën të ndihesh një fakt i tillë?

Jam krenar dhe këtë krenari e ndaj me të gjithë shqiptarët. Gjithë media botërore ka folur mbi rekordet e mia dhe së fundi, në faqen zyrtare të Këshillit Europian jam zgjedhur si përfaqësuesi i Shqipërisë për rekordin e fundit botëror me mozaikun tim.

A ke pasur përfitime nga këto rekorde që keni vendosur?


Në faqen zyrtare të Rekordeve Gines thuhet qartë se ata vetëm njohin atribute dhe certifikojnë me kompetencë të plotë fenomene që ndodhin rrallë në botë dhe nuk japin shpërblime financiare.

Në pjesën tjetër të botës ekziston një komunitet që i përkrah njerëzit e këtyre rekordeve, pasi ditën që certifikohet një rekord i ri, qyteti përkatës bën festë dhe kthehet në qendrën e vëmendjes mediatike ndërkombëtare.

Le të rikthehemi te tematika e kësaj radhe. Pse zgjodhe pikërisht Majkëll Xheksonin?

Besoj se jo vetëm artistët ose bashkëmoshatarët e mi e adhurojnë figurën e tij pasi të shumtë janë edhe të rinjtë, fansa të Xheksonit. Nuk jam pjesë e kritikës muzikore, por personalisht, do ta veçoja figurën e tij nga shumë intepretues të tjerë.

Do të vazhdosh gjatë të vendosësh rekorde të tjera përveç këtij të katërtit që të gjithë e presim?

Përgjithësisht, jam mësuar që shumë nga njerëzit që takoj, të më pyesin se cila do të jetë vepra ime në vijim. E them me krenari artistike si krijues, se të trija rekordet e mia nuk kanë mundur të thyen nga askush dhe nuk kanë për t’u thyer për një kohë të gjatë. Të treja veprat paraardhëse janë themeltare dhe unikale në historinë e rekordeve gines, qoftë nga kategoria, apo dhe nga dimensionet, ato nuk ekzistojnë në asnjë vend tjetër të botës.

Së fundi, sa rekorde gines mendon se do të vendosësh në jetën tënde?

Do të më pëlqente që në përgjigjen e kësaj pyetjeje të mos isha modest, pasi do të vazhdoj të vendos rekorde aq sa të mundem.

Botuar ne gazetën “Albania”, 17 Shtator 2009

e ka ndertuar te djelen qe kaloi te skenderbeu....hallall ja beft zoti qen ka kto aftesi