Histori të tmerrit...", libër testament

Prishtinë - Përshpirtje për të gjithë të rënët është quajtur promovimi i librit “Histori të tmerrit 1998- 1999”, i autores Sanije Gashi, që ka përfshirë dosje krimesh të luftës, rrëfime të grave që kanë përjetuar luftën dhe humbjen e më të dashurve të tyre. Fillimisht, nga fjala e moderatorit Hivzi Krasniqi, e thënë me një elokuencë të veçantë dhe zhdërvjelltësi rezonimi dhe vlerësimi mbi të jashtëzakonshmen e librit, ofrohet uvertura për një libër të madh. Sikurse që krejt libri të sjell emocion, dhimbje, kthim prapa në kohë dhe njohjen me realitetin e përjetimeve të grave drejtpërdrejt me luftën, edhe promovimi i librit që është mbajtur të enjten, në Bibliotekën Kombëtare dhe Universitare të Kosovës, ishte emocional, pasi që dënesjet e të pranishmëve ishin të pandalura deri sa flitej nga të pranishmit për gratë e futura në këtë libër, të cilat kanë rrëfyer më thellë për dhimbjen e tyre që e bartin nëpër kohë, njofton e përditshmja “Zëri”. 33 rrëfimet nga 33 gratë e atakuara drejtpërdrejt nga lufta, në këtë libër me 383 faqe është vlerësuar të jetë dëshmi e gjallë që do të shërbejë si dosje dhe për thirrje që të mos lejohet përsëritja e një historie të ngjashme.