Plazh per femijet- Beni kujdes!

Muaji korrik ka nisur me kohë të kthjellët, rreze të nxehta dhe pak erë. Kohë krejtësisht e përshtatshme për ata që kanë zgjedhur sot bregdetin për të kaluar fundjavën. Bojko Themelko, meteorologu i shërbimit meteorologjik siguron pushuesit se temperaturat nuk do të bien nën 29 gradë Celsius. Në të gjithë vijën bregdetare të vendit tonë nga Saranda në Velipojë, termometri do të shënojë nga 29 deri në 33 gradë Celsius. Sipas meteorologut, në Durrës, Shëngjin, Vlorë dhe gjithë zonat e tjera bregdetare, temperatura maksimale do të jetë 33 gradë Celsius. Erë e lehtë pritet të fryjë në brigjet e Jonit, ndërsa në Adriatik, s‘do të ketë erë. Por pushuesit, edhe pse në një ditë relaksi, nuk duhet të harrojnë këshillat e mjekëve. Ato nisin me gjërat e thjeshta që në dukje janë qesharake, por të domosdoshme për të mos përfunduar nga bregu i detit në urgjencën e spitalit. Kështu, pushuesit duhet të programojnë kohën e qëndrimit në diell. Të tregojnë kujdes me veshjen e rrobave mbrojtëse përfshirë kapele dhe syze dielli, si dhe përdorimi i kremit të mbrojtjes nga dielli. Këto janë elementët kryesorë për të pushuar këndshëm.
Dielli ka anët e mira dhe këqija të tij. Duke nisur nga pozitivet dhe duke cituar mjekët janë: Ndikon mirë në shëndetin e organizmit të njeriut, në lëkurë, por një rrezitje, një marrje rezesh në masë, pa e tepruar. Por çfarë duhet të bëjnë që kënaqësia që të japin rrezet të mos kthehet në bezdi. Ata që dalin për herë të parë në diell nuk duhet të qëndrojnë më shumë se katër pesë minuta, për shembull, paradite. Nëse nuk ka djegie apo skuqje të lëkurës, mund të rrihet edhe deri në dhjetë minuta pasdite. Kjo varet edhe nga lëkura që kanë. Ata që kanë lëkurë më të errët mund të qëndrojnë edhe më shumë. Por ata që kanë lëkurën më të çelët, më bionde, ata digjen shumë më shpejt, madje edhe kur janë nën çadrat e diellit. Tepria me diellin është vdekjeprurëse. Doktor Lorenc Osmani, thotë se "për këtë duhet të tërhiqet vëmendja për të gjithë ata që dalin në diell. Sidomos për fëmijët e vegjël është e rëndësishme që të mos e teprojnë qëndrimin në diell". Nga marrja me tepri e rrezeve, lëkura reagon me formimin e karcinomës së lëkurës në moshë më të rritur, ose në moshën e shkuar. "Ne i shohim karcinomat e lëkurës në sipërfaqe të cilat shfaqen më se shumti nga dielli, fytyra sidomos dhe pjesa e shpinës e dorës, por më shpesh në fytyrë", thotë mjeku. Kjo tregon se rrezet ultraviolet të diellit janë shkaktari kryesor për karcinomat e lëkurës. Mendohet diku më shumë se 95 për qind e karcinomave shkaktohen nga rezet ultraviolet të diellit. Rrezikimi i jetës më shumë shkaktohet atëherë kur rrezatohet tepër koka, kur koka është e qethur, kur nuk ka mbrojtje as në kokë, atëherë rreziku është edhe më i madh. Këtu përmendim domosdoshmërinë e përdorimit të kapeleve. Ndërsa për lëkurën, mbrojtësi ideal është kremi solar. Ai ngjyros në mënyrë artificiale shtresat sipërfaqësore të epidermës dhe nuk ka asnjë efekt mbrojtës. Ekspertë francezë, prof. Daniel Lambert dhe dr. Catherine Laverdet që kanë kryer një studim të plotë për solarët dhe përdorimin e tyre shkruajnë në uebin e tyre se rrezikoni të digjeni. Në plazh këshillohet të përdorni mirë solarin. Kështu, mbylleni shpejt kremin solar dhe futeni në çantë. Përndryshe, rrezikon të prishet brenda pak ditëve. Treguesi 20 UV i korrespondon një mbrojtjeje të fortë. Në të njëjtën kategori hyjnë gjithashtu edhe treguesit 15 dhe 25. Pak ndryshim ka mes të treve dhe ata të gjitha bëjnë të mundur mënjanimin e goditjeve të diellit. Treguesi 50+, të cilit i korrespondon mbrojtja maksimale e rekomanduar për lëkurat që nuk e tolerojnë diellin edhe në rast sëmundjesh të rënduara nga ekspozimi në diell. Orët e paradites dhe pasdites janë ideale për një nxirje të ngadaltë. "Përpara orës 11:00 dhe 17:00 pushuesit mund të nxihen, por më ngadalë", deklarojnë dermatologët.
USHQIMET
Të freskëta, të ziera dhe të lara. Këto janë tri këshillat kryesore të mjekëve për ushqimet në sezonin e verës. Në asnjë rast nuk duhen përdorur ushqime që tregtohen jashtë kushteve frigoriferike, ku më të dëmshmet janë mishrat dhe bulmetrat. Për sa u përket frutave dhe perimeve ato këshillohet të lahen duke u fërkuar fort dhe duke u shpëlarë me ujë të rrjedhshëm. Shpeshherë mungesa e kujdesit çon në helmime që jo rrallëherë janë edhe të rrezikshme për jetën. I domosdoshëm për këtë periudhë është konsumimi i perimeve dhe frutave të freskëta, pasi hidratojnë trupin njeriut dhe i japin lëngjet që ka nevojë më shumë, në mënyrë natyrale. Ndërkaq, për t‘i shpëtuar helmimit ushqimor, sipas tyre, duhet higjienë dhe gatim i plotë i ushqimeve. Çrregullimi, sipas mjekëve, është i lidhur ngushtë me të nxehtin dhe higjienën e të ngrënit. Nuk ka ushqime të rrezikshme ose jo, mjafton t‘i gatuani tamam, pa i lënë gjysmë të ziera, këshillojnë ata. Rrezet e diellit dhe ushqimet e prishura shkaktojnë diarre, tension të lartë gjaku, të vjella etj. Uji është parësori për të përballuar të nxehtin. Duhet konsumuar minimalisht 2 kg ujë në ditë. Ndërkaq, mjekët nuk harrojnë të kujtojnë edhe lëngjet e tjera natyrale si qumësht, çaj, lëng supe etj
MOS HARRONI !Në ç‘moshë dalin bebet në plazh?
Mjekët pediatër shprehen se "ideale është që t‘ia evitosh vajtjen në plazh bebes deri në tre vjeç. Kjo, sepse ai mund të goditet nga dielli, edhe nën çadër, ngaqë ekziston një shpërndarje e rrezeve UV edhe në ajrin përreth dhe një reflektim në tokë. Duhet mbrojtur patjetër me krem special për fëmijë dhe rezistent në ujë. Duhet të ekspozohet në diell pak nga pak, jo më shumë se çerekore ditën e parë dhe të evitohen orët më të nxehta të ditës. Për të gjithë ata prindër që nuk i rezistojnë dot plazhit këshillohet që të vegjlit e tyre të mos i mbajnë në bregdet pas orës 09:00.

hi loresa flm shume per informacionet e mirse erdhe ne mesin tone